以下孕期紀錄轉至facebook專頁
上回講到我同男人去到照超聲波嘅診所發現醫生唔喺度+冇booking
後來先知係用錯名登記嘅問題
呢篇孕記嘅開始時間返返去第一次照超聲波嗰日…
孕婦超聲波初體驗
第二日再訪診所時, 接待員已經認得我地
準時到達嘅我地跟住佢入房間等醫生
等待嘅時間好緊張呀
前排上網check過準媽媽通常喺懐孕13、14週時做第一次照聲波
大概就係我地返到法國嘅日期
為咗慳錢, 我地等多咗2, 3個星期先見BB
佢可能已經好活躍喇
喺法國, 醫生梗係講法文啦
我唔識聽法文就靠曬男人嘅翻譯嘞
我半攤坐喺張椅到、面向螢幕, 隔離係醫生位同電腦
醫生一入房邊戴手套邊講咗句野, 男人翻譯話醫生睇我個肚嘅大細都似16,7個星期大
我按佢嘅指示瞓底、將上衣拉起至肚上
之後醫生開始搽啲gel喺我肚皮幫我照超聲波
又同我男人講話佢會邊睇圖邊用法文解釋, 完曬先由男人翻譯俾我聽
係我自己唔識法文在先, 唯有期待多一陣啦
BB 超聲波進行中…
個醫生一路碌我個肚, 一路zoom大zoom細cap圖同解釋睇緊嘅係咩部位
但佢全程都無笑過, 臉無喜悅又全程講法文
搞到我超級緊張, 想快啲聽到翻譯
最後打埋預產期日子仲出咗房
由於我副眼鏡喺丹麥截車嘅時候喺個油站度跌咗, 所以睇唔到日期同其他字
睇圖嘅時候又黑又唔知邊個方向係頭完全唔識睇
所以醫生一路碌嘅時候我都淨係望住男人等佢開口
但佢個樣嚴肅過平時好多又唔笑搞到我以為個胎唔正常…
快啲同我講BB點啦!!!
超聲波結果
男人叫我先冷靜, 咁講我仲驚呀
如果係好消息應該唔洗冷靜掛..
好彩佢開口第一句係:醫生話BB睇落一切正常
我同佢講:個醫生全程無笑過嚇死我呀!
然後再叫佢翻譯多啲
之後佢好凝重咁同我講: 個BB睇落一切正常,
但佢唔係我地預期中嘅16,7星期大, 佢嘅發育程度似係已經34週大嘅BB . . .
晴天霹靂
當下反應唔切呆到眼淚水都噴出黎, 以為自己陀緊怪胎
一入房又話似十六七週嘅?
雖然抵達法國後見嘅部分人話個肚係三個月嘅話可能係巨B或孖B
令我以為巨B或孖B已經係驚嚇嘅極限
估唔到再驚嚇啲都仲得!
34週? 翻咗一倍喎? 咪即係隨時出得世!
但我嘅準備工夫仲停留喺去邊度生仔同孕婦嘅飲食禁忌喎
因為旅行期間冇足夠營養所以啱啱先開始注意飲食
點知原來呢個moment已經補唔切…
驚嚇flash back…
腦內閃出不同嘅陀B禁忌
幾個月嚟食嘅泰式、馬來西亞式辣BB都試勻, 會唔會刺激佢嘅腸胃架?
好彩窮遊嘅日子冇點飲到酒同咖啡…
所以之前以為嘅m=作小產出血?
陀住B著住人字拖踏遍西馬來西亞嘅各州
旅途中有時仆落山有時又爬爬下坡跌落黎+
男人又有一排喺人地屋企睇WWE睇得興喜將我多次由高空掟去床同梳化+
旅行期間太熱我叫嘢飲會加冰+喺唔知情下32,3週坐咗長途機
心諗個B留得到宜家都算幾命大…
第一次照超聲波見BB嘅後續
由於個醫生唔係婦科醫生, 淨係專業睇超聲波
加上因為BB已經太大個, 手手腳腳五官都睇唔清
所以佢建議我地去醫院做詳細檢查準備生仔
“點解可以陀咗咁耐仔都唔知?”
Thank you咗醫生、離開咗診所之後
男人講咗句”nothing can shock me anymore”
問我點解可以陀咗咁耐仔都唔知架
港女式回應
咁我4月中, 6月底都出過血
雖然少過平時嚟m好多, 日數都少幾日
但我以為係行多咗、運動多咗、人健康咗啫
有血就係m, 點諗到咁多啫
加上我又無作嘔作悶, 淨係成日一上車就訓
但我不嬲喺地鐵企喺度扶住條柱都訓得著, 好難因為訓多咗而發現有咗架喎
照超聲波後嘅打算
即使已經懷孕34週, 但男人仍然唔放過去第二度生仔嘅機會
因為佢同我唔想返香港一樣, 唔想留喺法國太耐
我地想喺第二度待產, 令待產期間仍然處於旅行mode
歐洲好多國家生仔都安全: 手術期間難產同嬰兒夭折率低
本來我列咗表寫低想去邊度生, 但申根簽証規定港人只可以喺180日內留喺申根區共90日
我地喺等照超聲波前已經因為我想留喺申根區生仔嘈過
照完後反而因為個BB仲有幾個星期就出世冇簽證問題一天都光曬
家庭醫生嘅意見
離開見BB第一面+照超聲波間診所後
我地喺返屋企前去埋男人個家庭醫生度問意見
醫生話只要媽媽覺得ok又上到機, 36週後都飛得
雖然醫生開綠燈
但當時我諗: 未知個B係咪健康正常,
如果花一大筆錢飛去第二度生, 生嘅途中要轉緊急開刀咪破產都似?
心裡打算都係留喺法國生算 雖然冇保險都係貴, 但起碼慳咗筆機票錢同待產期間生活費
男人可以日日陪住待產到時又可以翻譯法文
(起初諗過去加拿大/墨西哥, 因為想BB多個國籍, 但加拿大冬天凍到一個點物價又高,
見醫生再照超聲波、緊急開刀生手術費住院費逐樣計超貴; 墨西哥就有語言障礙,
而且好多醫生為咗合乎經濟效率鍾意開刀多過等你自然生, 所以拖到話照完超聲波先決定)
屬地主義: 唔理父母係咩國家嘅人, 只要出生喺該國嘅領土, 就自動獲得該國國籍
男人老豆、Darian爺爺對超聲波結果嘅反應
返到屋企男人老豆對我地擺大烏龍表示驚訝
但我估佢係開心嘅
成年半無見個仔宜家因為要等我生仔所以有得見耐啲
驚嚇孕記之後
驚嚇孕記就寫到差唔多, 但係仲有啲孕記係正常嘅~
想知我由入法國醫院登記–>見助產士同醫生–>再照超聲波–>參觀產房等等嘅
陀Darian孕記仲可以睇埋驚嚇孕記番外篇之正常孕記
