香港x法國混血小旅人Darian眨下眼就4歲喇~ 自己一個人喺屋企廁所幫自己接生係點樣嘅經歷? 感受如何? 港媽將facebook專頁4年前喺法國屋企生BB嘅血腥爆笑生產記搬埋過嚟呢度, 等各位準媽媽喺上網被其他媽媽們嘅生產經歷嚇到喊時笑返下。
香港人表達強烈感受一定係用廣東話先! 此生產記的書面語版本有待更新
警告: 內含不雅描述, Darian18歲前需在媽媽指引下閱讀
荒謬孕記之後
荒謬孕記結束喺睇完卧虎藏龍嘅嗰一個晚上
當晚(2016/12/14)我地大約喺午夜十二點一點倒先瞓
我瞓到唔知幾點開始肚痛
因為凍同懶嘅關係
加上我同男人成日笑對方做pooping machine
如果半夜起身開大第二朝一定俾佢笑
所以我決定忍到聽朝先屙…
半夜辦大事
點知肚痛痛到瞓唔著 仲要係絞肚痛嗰隻
左側睡右側睡仰睡都試勻曬都瞓唔返
唯有離開暖暖嘅被竇去廁所
半夢半醒坐喺個塔度
有想屙嘅感覺但唔係好屙得出
最後屙咗小小就決定返房瞓
重返被窩
洗完手好奇幾點鐘
所以望咗下相機時間(房冇鐘+旅行開始冇用手機)
四點唔到 即係仲有幾個鐘瞓啦 (懷孕後期晚晚十二點一點先瞓, 朝朝起碼九點十點先起身)
返到房我嗰半邊床已被攻陷…
要移開某重人+搶返張被先進入到睡眠mode
屙完又真係俾我瞓得返, 仲幾好瞓添
不過瞓得唔耐
因為之後又再肚痛…
呢次仲要係強勁肚痛+便意
所以我毫不猶豫就即刻出去廁所
再辦大事
坐咗喺個塔到一陣就心知不妙…
“可能係便秘!”我心諗
想屙但屙唔出
又feel到有嘢卡住咗唔出唔入咁
其實我雖然肥底 但從未有便秘嘅感覺
嗰陣淨係feel到肚痛+要屙屎
坐喺個塔度移黎移去 坐前啲坐後啲都冇料到
唯有試下用唔同方法: 企起身
試完都依然係屙唔出
嗰下我知道屙唔出就瞓唔返
所以我深呼吸後又坐返低再試過
愈來愈唔對路
明明大凍天時但竟然因為屙屎唔出而冒汗, 熱到連褲都除埋
我淨係想快啲屙完返去瞓!!!
企直+扶住牆半企+坐塔 不停交替後發現仲係好肚痛
突然好驚屙屎唔出會影響個胎
冇常識嘅我驚住BB會俾屎塞住抖唔到氣
開始邊用力屙邊低鳴男人名
其實知道咁樣低鳴叫得醒佢嘅機會頗低
因為我出房時佢係熟睡狀態身都冇轉一下
而我又隔住兩道門低鳴…
當時心態係身體出現異常唔知點算好
好驚影響BB健康+想有個人陪下
但又明白叫醒佢都幫唔到我
始終開大呢家嘢都係個人嘅事😂😂
於是又一輪企直+扶住牆半企+坐塔等唔同方法不停交替(肚痛仍在)
緊急生B徵兆?
某一個坐低嘅moment見到底褲有之前冇嘅液體
開頭得一兩滴 過多幾秒多咗一大灘
心諗:大鑊!
屙屎屙到羊水都穿埋 個BB會唔會難產架!!!
冇時間諗點樣叫醒男人再入醫院就又再feel到肚痛+屎眼爆開嘅感覺
搏一搏 痾屎都變…
當時扶住牆半企姿勢嘅我決定:
唔理喇, 用力屙咗屎先, 屙完就去醫院檢查
一呼吸一出力ush
舊嘢唔喺後面出 而係喺下面直出
低頭一望, 咁多毛嘅??
再望
成個醒曬!!
係頭髮呀sh*t!!!
屙屙下屎變咗生仔呀變態
意外喺屋企生BB後…
以下嘅嘢唔太記得正確次序 淨係記得出現過…
有個呀媽喺佢下面拖咗一團嘢出體外
有個成身血嘅BB出現咗喺廁所嗰塔隔離塊地下, 喊緊
有個呀媽想烏低睇下個血BB嗰陣跌咗個胎盤出黎
有個被召喚咗好多次嘅男人終於出現 見到佢成身血嘅女人企喺佢個被噴滿血嘅廁所 地下有一團嘢喊緊 個男人展現出最驚慌嘅一面 驚叫咗一下
冇耐個男人叫醒咗佢老豆 佢老豆上黎見到上述場面 抱起咗訓咗喺凍地板幾分鐘嘅嗰團嘢
再抱返上黎嘅時候已經用毛巾包住咗 連住一個用膠袋裝住嘅胎盤
呢個時候啱啱做咗人老豆嘅男人已經打完電話叫救護車準備換衫同執走佬袋
而嗰個啱啱做咗人媽媽嘅女人呆咗幾分鐘後覺得自己成身血好污糟 所以行咗去沖涼? 因而滴出一條血路…
啱啱生完仔嘅媽媽沖完涼仲去揾返條底褲着 因為佢發現下體仲流緊血 佢仲懶醒咁揾廚房紙墊住(未準備產婦衛生巾…)
新手媽媽着返衫後用毛巾包住下身攤起梳化攬住個用毛巾包住嘅BB喺被下面skin to skin…
冇耐消防員到咗(唔好問點解係消防員到 我都唔知)
佢地話BB出生時間係0645
唔知當時幾點 但應該差唔遠掛
佢地借咗把小較剪俾BB爸爸剪臍帶
再用塊emergency blanket包住BB
再剪開隻襪?反轉之後變咗頂BB帽
擺駕醫院
後來醫護人員都嚟到
仲係識講英文嘅添
幫媽媽打咗點滴量咗血壓
BB喺做完簡單檢查後就由爸爸抱咗上救護車
媽媽就由兩個大隻消防員移咗上張櫈 抬落樓梯 之後移上病床上救護車
喺車上面攬實BB嘅媽媽feel到下面有漏m嘅濕…
搖咗十至十五分鐘倒到達醫院
媽媽再次被大隻佬消防員/救護員移去輪椅, 抱住BB由爸爸推咗入產房
之後做咗詳細啲嘅檢查:
BB:度頭圍+磅重+口服維他命K+量體温+保暖
媽咪:檢查出血狀況+睇下有冇撕裂要唔要縫針+檢查胎盤係咪已經完整排出+㩒下肚感受下子宮位置同硬度
助產士話唔洗縫針yeah!
在家生產成就解鎖
意外地完成咗零止痛零手術零障礙嘅全天然生產過程
好彩Darian醒目識自己爆出嚟又冇被臍帶纏頸冇complications唔洗緊急開刀
如果唔係我都唔識處理…
傻傻嘅Darian老豆問我Darian姓咩
梗係跟你姓啦 前兩日改名又問今日又問
我唔會要個仔加埋我個姓做中間名架 好leung呀XD
生B後即時感覺
由於Darian係輕磅BB(2480g, 爭20g先達標)
之前親戚送嚟嘅三件和尚袍太大件
而我地又未買衫仔未準備走佬袋
所以Darian人生第一套嘅衫仔同襪仔係醫院借出嘅
由8點幾檢查再等BB着衫(途中把握機會餵人奶)
等到10幾11點先坐輪椅上房
當下嘅感覺係…
…
…
好肚餓!!!!!
雖然都好眼瞓 但我想食嘢多啲
明明生完仲好精神走去沖涼
被人抬嚟抬去之後就好眼瞓
好彩上到房冇耐就有護士派飯yeah!
坐月禁忌?
Darian喺我餵餵下奶嗰陣瞓咗
所以我可以自由地狼吞虎嚥成個午餐
完全無視之前睇落話唔好食生冷嘢嗰啲坐月禁忌
食咗跟餐嗰杯乳酪同芝士
冇所謂啦食完熱嘢先食凍嘢應該冇事嘅
冇開刀身體冇咁虛弱百無禁忌~
神隊友
可憐嘅Darian爸爸望住我食心裡面應該流曬口水但又要拒絕我嘅分享三催四請下先肯食個小小法包
未瞓夠+一大朝早受驚+仲捱緊肚餓嘅佢睇住我食完冚被訓先親親BB親親我再出去買BB衫同入院用品
護士入嚟收餐嘅時候問我覺得點+再量血壓+檢查有冇出血
知我唔識法文仲努力同我講英文 實在令人感動!
到我再醒嘅時候Darian爸爸已經買咗0個月大嘅BB衫返嚟
喺屋企生仔後有感
抱住個0日大嘅BB望住件極衫嘅BB衫仔 好似發緊夢咁
再加上15號係我同男人嘅相識紀念日
今個月15號多咗BB同我地一齊慶祝好開心呀
男人又提早喺前一晚整咗Tiramisu
見住兩個我最愛嘅男性 食住超級好味嘅Tiramisu
生完仔嘅痛都唔記得嚕
抱住小小Darian行咗幾個圈先返房食晚餐
法國醫院有熱主食有芝士有乳酪有甜品嘅營養餐認真唔錯
由於我係瞓二人房, 所以男人唔可以留喺房同我過夜
臨走前佢千叮萬囑我有時間要記低心路歷程寫返篇生產記
十一點倒我就開始孤軍作戰打大佬+偷時間寫呢篇生仔回憶錄嘞
