[孕記] Darian孕記(第1集)驚嚇篇(上)

Share on facebook
Share on twitter
Share on whatsapp
Share on email
陀Darian孕記第1集驚嚇篇(上)

以下孕記轉至facebook專頁, 係當年生完Darian之後嘅一個記錄

要分享如何育成旅嬰, 首先要有嬰兒,
而呢個嬰兒其實都係喺旅行中製造嘅, 所以一出世就註定係旅嬰!
一齊嚟睇下缺乏性教育知識嘅港女嘅孕期有幾荒謬

出發去旅行…

2016年3月24號 我行咗22年黎最多嘅路
因為我男朋友老遠從法國搭順風車到香港
而且因為新年同我留咗喺度三個月, 所以唔想就咁搭車離開香港…
於是, 我地由佢喺土瓜灣打工換宿嗰間hostel出發, 行路去落馬洲…
嗰日本來已經天陰, 行行下仲落埋雨
我地一人揹住一個背囊、着住件雨衣(佢仲要着住拖鞋…)行咗十個鐘有多
問路得到鼓勵同菠蘿包+被警察講完唔可以行路過關後得的士司機義載同祝福後完成旅程嘅第一日

順風車旅行第一日嘅雨天look
Maxime順風車旅行第一日嘅雨天look

用5蚊人仔旅行7個月

之後每日截順風車同行路旅行
原本打算按佢原來嘅一日一歐元方式便車旅行
點知後來演變成一歐元七個月嘅便車旅行
咁當然唔係餐餐大魚大肉七個月先用得一歐元啦
而係要行好多路露好多次營唔怕成日捱餓間中有餐正常份量又有時罕有地有大餐食先做到
幾個月後我地經中國去到老撾緬甸泰國馬來西亞新加坡
再因為新加坡之後已經冇路可截車而返馬來西亞揾船
由於喺泰國同馬來西亞遇到嘅人都好好客好少要捱餓
所以8月嗰陣喺打工換食宿嘅榴槤園 個印尼煮飯姐姐問我係咪有咗嗰陣傷心咗一下
心諗頭個幾月減到嘅十幾磅因為食幾餐好嘅返返黎…
之後去到一個搭順風車認識嘅朋友屋企住
佢嘅菲律賓親戚又問我係咪有咗, 即刻sad到飯都唔敢食咁多

旅行期間喺榴槤果園打工換食宿
可能係第一個喺榴槤果園打工換食宿嘅法國人

上免費順風船前

到9月喺等船主返黎馬來西亞期間再遊多一圈後再返返呢個朋友屋企
攤喺張床唔知係幻覺定咩feel到個肚好似有另一個心跳
由於我地揾到嗰架船係去南非嘅
而我又瞞住呀媽過緊冇電話用嘅窮遊生活, 上咗船就3個月冇網絡
所以男人想我返香港見下呀媽
咁啱有人知道我地之前俾人偷咗行李, 又想我食佢餐訂婚飯
機緣巧合下我就返咗香港幾日

快閃香港

有日去咗我地拍拖好鍾意去嘅深水埗
去到西九龍中心見到好多唔同味嘅雪糕
幾世冇食雪糕嘅我一個下晝食咗7,8 球
第2日諗住去家計會驗孕
但打完電話要一個鐘內到, 成個過程要預2個鐘
仲一定要見埋醫生定社工冇得淨驗孕, 收費過七百
太耐冇用錢又趕住夜晚跟fd學游水嘅我就咁買咗驗孕棒喺廁所驗孕
陽性條線唔夠幾秒就出現咗…

嬰兒發現!
嬰兒發現!

發現旅嬰驚嚇

當時好似呆到連粗都唔識爆, 驚嚇到一個點
而且仲有一兩日就返馬來西亞
怕痛所以冇諗住私下墮胎
未有太大做人呀媽嘅感覺, 好似有少少頭幾個月陀唔穩自然流產就算數嘅諗法(宜家諗起會大叫 :啋)
於是咩都冇諗只係把握機會喺香港食多幾餐好西 就揹返原本飛返黎接近空嘅背囊返馬來西亞
水緊係未學識游啦
但咁難得可以免費學法文學航海嘅順風船機會點可以放過
識得撥下水就當識識地游架喇

“我個肚腩係個嬰兒”

抵達吉隆坡機場係凌晨一點倒
因為上次喺其中一個泰馬邊界冇過夜又冇俾過路費
即日來回visa run俾個關員寫咗啲嘢喺本passport
所以又要入房解釋一輪 仲要show埋相承諾今個月真係離開馬來西亞先入到境
見到男朋友嗰下真係爆喊呀
行返去我地喺機場蓆地而睡過嘅地方訓完到朝早先同佢講
: 我地一直研究緊嘅肚腩唔係腩而係個BB

佢呆咗成日冇講啲咩
到夜晚去到另一個朋友屋企佢先黎料真情剖白
由於咁樣嘅旅行方式
加上最後一次見紅係6月底
所以對BB大概幾大我地都心裡有數
當下決定係陀住繼續旅行等船主處理完家事返到黎會合咗先再計劃下一步

吉隆坡KLIA嘅sleeping spot!
我地喺吉隆坡KLIA嘅sleeping spot!

搭便船之船上生活

幾日後會合咗船主, 再喺船上幫咗幾日手學咗幾日嘢都仲未開到口講
悶悶不樂嘅男人有一晚提議不如落咗個仔
話我地仲後生仲有大把機會
由馬來西亞行船去南非嘅機會真係好難得
尢其我地係完全新手佢地都肯免費帶我地出海
講真佢地兩個人大把經驗
雖然已經六七十歲 但冇咗我地完全冇問題可能仲行得快啲
我又想行船又因為開始同BB講野唔捨得放棄佢又怕痛又怕血所以唔知點反應
爆喊之後訓到第二朝
男人應該又諗過下, 同我道歉之後去咗問同一個Marina另一對法國夫婦嘅意見
大部分內容都聽唔明嘅我見到佢地3個人不停望住我、間唔中笑下
等到最後聽到英文 大致上係 :
1)你地架船嘅船主都係易話為嘅人 應該冇問題嘅
2)我地個仔喺個肚度8個月大嘅時候我地都仲喺海上 大肚行船冇問題嘅
3)你覺得身體ok就冇問題架喇
於是嗰個下晝我地同船主夫婦講咗
佢地恭喜我地即將成為爸爸媽媽, 又話會幫我地問下家庭醫生嘅意見
我地即刻放鬆咗繼續積極學航海知識

順風船上打工換食宿之車沙發套
順風船上打工換食宿之車沙發套

便船上嘅變卦

可能因為準備工作嘅進度唔理想, 錯過咗最佳航海嘅風
又或者係四個人成日喺船艙入面日對夜對磨擦多咗
加上家庭醫生對航線有成十日喺海上遠離任何陸地而擔心
所以多次講數之後船主改變主意只帶我地去到澳屬嘅Cocos Keeling Islands
我地本住到時已經有經驗應該易啲揾到船繼續旅程嘅心態準備出發

孕記中的第一張孕照
孕記中的第一張孕照

緊急降落印尼小島

點知我唔爭氣…
出海第2日就開始暈船浪, 仲唔食唔飲都有嘢嘔
連續3晚出面橫風橫雨都幫唔到手, 只係攤喺度半死狀態
男朋友以為我當時就死, 係咁叫我撐住返到法國食好西
船主仲爭啲想叫醫療直昇機
好彩冇叫, 唔係賣仔都唔夠找數
最後緊急上岸, 去咗一個美麗的印尼小島
上岸後當地人唔知喺邊度揾到個醫生幫我檢查
因為冇儀器其實都係唔知個BB點
佢問我仲feel 唔feel到BB郁就俾咗樽仲有2個星期到期嘅藥水俾我
唔知樽上面寫咩嘅我梗係冇食啦
反正我上岸後好快就冇事, 明顯地唔關BB事係我自己暈浪…

短暫嘅印尼便車旅行

又露咗兩晚營之後竟然好彩到俾我地喺當地人幫忙下坐到另一架輪船去雅加達
但印尼煙民多, 而且車路崎嶇連斷橋都俾我地遇到
加上第一次產前檢查建議喺第10-14個星期做
所以我地探索多一個星期倒就搵最平嘅方法返法國

7個月陸路旅行後嘅第一程飛機

我地最初選擇嘅方法出現咗問題
最後解決辦法係喺印尼飛新加坡搭順風車去曼谷機場再飛去挪威奧斯陸
11月頭嘅奧斯陸得2度, 我地着住短袖衫長褲拖鞋抵達機場
第2朝機場附近條公路企到腳趾發紫先截到架車出市區求助
網民是偉大的
我地揾到衫之餘仲因為 ‘’大肚唔可以捱餓’’而得到食物

一夜換季之旅嬰爸媽在奧斯陸
一夜換季之旅嬰爸媽在奧斯陸

有保暖衣物後又想繼續旅行嘅我地又再重施故技住咗喺一個squat幾日
再坐郵輪去丹麥訓機場兩晚, 參觀完博物館然後先截車返法國
原本想去埋瑞典先返法國架!
但當時BB已經13,4個禮拜大, 天氣又凍
心急想見BB嘅我地就返法國俾個驚喜男朋友個爸爸

無門入嘅遊子

到達屋企嗰一晚我地滿心歡喜
因為成十點幾都仲截到車而且個司機仲車我地到屋企門口
不幸嘅係爸爸唔喺屋企我地冇門入, 爭啲要喺花園露營
好彩男朋友決定搏一搏, 半夜行去佢BFF屋企
超級老死嘅佢地揸車返黎接喺帳篷入面訓緊嘅我
我地唔洗天寒地凍訓帳篷之餘第二朝仲一人鯨吞咗一條法包!

照超聲波前嘅等待

因為我冇旅遊保險又唔可以喺法國留多過3個月用唔到男朋友份保險
所以hea咗幾日打電話格完價後約咗十日後照超聲波
與此同時 我個肚都愈黎愈大喇
呢十日我地除咗諗去邊度生仔
仲心郁郁想去意大利荷蘭等鄰近城市旅行
可惜唔係落雨就係太凍不便截車
於是只留喺屋企諗去邊生仔同惡補懷孕知識

到咗照超聲波嗰日 BB大約17個星期大
去到診所講完名掛號後接待員竟然話冇預約記錄
發現冇booking後我地瞬間崩潰
個護士姐姐記得接過我男朋友電話但就係揾唔到預約資料
而醫生當日唔喺度 一定冇得照
後尾發現原來係用錯咗我個名登記, 日期係後一日
虛驚一場…

打咗咁多字都仲未打到最驚嚇嘅一段, 睇埋下集孕記就知有幾驚嚇

Share on facebook
Share on twitter
Share on pinterest
Share on whatsapp
Share on email

發佈回覆

你的電郵地址並不會被公開。

About us

HiuYing, Darian, Mati and Maxime

♥ 香港 x 法國 ♥ 熱愛旅行嘅一家4口 ♥

Follow我地新奇又有趣嘅旅程啦!

一齊CLS! Comment, Like & Share!

Share on twitter
Share on facebook
Share on google
Share on linkedin
Share on reddit
Share on pinterest
Share on email

想知我地一家人長期旅居嘅秘技??

Join Our !

確保您唔會錯過我地嘅最新動向
啟發您大膽走出comfort zone!