[孕記] Darian孕記(第3集)正常篇之孕晚期產檢

Share on facebook
Share on twitter
Share on whatsapp
Share on email
陀Darian孕記第3集正常篇之孕後期產檢

第1次照超聲波就發現原先以為得16,7個星期大嘅胎兒已經發育到34週.
得返唔夠2個月就生得, 仲可以入醫院做啲咩產檢補返數?

先利申: 我的法式產前檢查與大部分的法國媽媽不一樣, 本記錄純粹分享一下法國公立醫院的做法, 我所在的城市人口不足十萬人, 最大的公共醫院只有這間, 大部分在這城市出生的人都是在這醫院出生…

公立醫院的第一次產前檢查

喺非婦科超聲波醫生嘅診所照完第一次驚嚇度爆登嘅超聲波後
第二日我地就行咗一個鐘倒到咗公立醫院開file見助產士同見類似處理財務援助嘅社工
第一次見助產士時, 佢問咗父母2邊嘅家族病史、幫咗我量血壓、問咗我孕期增咗幾重、抽咗7支定唔知9支血同驗尿
所有嘢喺2個鐘內完成
由於胎兒隨時會出世, 所以助產士俾埋問卷、叫我地約麻醉師嗰陣交俾佢
我完全唔識法文
所以男人陪我出席所有孕期檢查同埋翻譯
但十個非專業翻譯九個都只翻譯重點
每次聽到助產士講完2, 3分鐘嘅資訊被撮要翻譯成2, 3句都會令我超級緊張搞到我要不斷追問、推敲對話中仲有咩信息未被翻譯

喺醫院等照超聲波時快速眠一眠
喺醫院等照超聲波時快速眠一眠

參觀產房+聽胎兒心跳

之後參觀產房同第一次入房聽胎兒心跳
聽咗半個鐘倒, 助產士話胎兒心跳有13X/分鐘, 係一個健康BB
孕晚期檢查+測胎兒心跳+產房tour令我對產房的設置頗安心
第一次見產房同我想像中cctvb劇推入去嘅手術室爭好遠
雖然助產球、按摩池一概都冇
但間產房大過我香港屋企個廳, 既乾淨又夠光猛
又有浴室 可以喺等生仔嗰陣沖涼減痛
仲有BB磅同出世後檢查嘅地方
舒服得黎我幾鍾意 係令我呢個大肚婆感到舒適嘅地方
一連串嘅檢查都顯示我同BB都身體健康
只係我有啲缺鐵
所以自從第一次驗血驗出我缺鐵起我就每天食鐵丸、多食含鐵的食物如紅肉和菠菜(好多人以為菠菜高鐵但其實唔係…)

照第2次超聲波

因為BB隨時出得世, 所以第二日我地喺醫院婦產科照咗次超聲波存檔
醫院個醫生出乎意料地識講英文仲好好笑容
一邊睇圖一邊介紹睇緊嘅部位
可惜胎兒已經太大, 唔夠位住嘅佢用手遮住咗五官
唐氏症嘅測試因為太遲而冇得做, 但醫生話胎兒啲手手腳腳重要結構都齊
仲提到現時羊水量僅僅夠所以要飲多啲水, 如果唔係BB就要提早出世…
醫生仲話個胎兒似係35週大…
同上次照超聲波只隔兩日, 個B竟然大咗一個星期!!!
真係嚇到喊出嚟, 真係隨時出得世!
仲要唔知BB係唔係發育正常嘅健康寶寶
醫生鬼馬地多次問我地係咪真係唔想知個性別住, 我地話係(得返個幾月都唔爭在啦)
之後同佢約咗大約三個星期後再照多次, 但佢話如果生咗就唔洗去嘞

上網自學

每一次產前檢查都嚇親我, 好似提我時間無多咁
咩都未準備好:
冇莫扎特效應胎教、冇戒口、冇做孕期運動、冇準備“走佬袋”..咩都冇
但我隨時生得!
唯有喺唔眼訓嘅時候上網睇多啲生仔常識
開始學拉梅茲呼吸法, 希望減輕生仔時嘅痛楚
加埋日飲八杯水廢事唔夠羊水胎兒提早出世
希望喺仲可以改善嘅範圍內盡做

上網自學生仔減痛呼吸法嘅筆記
上網自學生仔減痛呼吸法嘅筆記

密集式見2個助產士

自從喺醫院登記後, 待產嘅日子好似變得更有計劃
幾日後一日見兩個助產士
一個係醫院嘅. 另一個係街外PMI嘅
佢地雙管齊下、密集地幫我認識法國醫院嘅一般生產準備及流程、分娩方法等
我喺短短幾日知多咗喺醫院生仔嘅流程
又問咗啲做資料搜集/參考其他生產計劃後遇到嘅問題, 消除咗啲疑慮
過幾日又再見佢地, 又再問問題
提起用麻醉我直頭喊咗出黎
事關助產士話未開到三指都未落得麻醉
而且就算落咗麻醉藥都仲有機會feel到痛
我平時打針都怕到一個點, 點忍到呢種被形容為”被車輾過”嘅痛吖??

無痛分娩

怕痛嘅我一直猶豫打唔打無痛分娩麻醉針好
網上有媽媽分享打完無痛後就好似上咗天堂咁真係唔痛
但亦有媽媽話打完一支好粗嘅針驚完都仲係好痛
最後仲因為唔夠力推BB出來而要開刀食全餐…
眾說紛紜…
我雖然怕打完無痛後會影響產程同自己嘅身體恢復
但生產嘅痛被形容為十級嘅痛應該係有原因嘅
為咗保險起見
我們都係約咗喺BB預產期前3個星期左右約見麻醉師傾下生產時嘅減痛方法

準備Birth Plan去醫院同助產士傾
準備Birth Plan去醫院同助產士傾

緊張大師準媽媽 vs 輕鬆準爸爸

記得當時臨急抱佛腳嘅我成日神經緊張
每日都睇生仔相關資料、不斷修改生產計劃(birth plan)
皆因進入產房後嘅細節小如吊鹽水嘅時間、產房內有助減痛的設置等都會影響產程
唔知係荷爾蒙嘅關係定點, 成日睇人地嘅生產記睇到眼濕濕
每次見助產士都準備一堆問題
而男人又一啲都唔緊張咁
都唔知係因為離預產期仲有成個月未有心理準備
定係佢覺得現階段佢無嘢做到嘅關係…
好似覺得冇需要了解相關知識咁
入院清單一樣都未買未執
叫佢翻譯份麻醉問卷又係兩三行翻譯一兩句
搞到我心急到自己google translate所有文件算數
叫佢上網睇下人地啲分享, 學下爸爸喺產房嘅角色
佢又叫我唔好睇咁多搞到自己咁緊張
我都明佢第一次做老豆咩都唔識唔知點幫
但當我講完我嘅憂慮、佢問我要唔要見心理專家嗰下
我真係想打爆佢!!!
大佬宜家係入產房生仔呀
到時有咩意外我要將廣東話翻譯成英文+靠曬佢翻譯成法文
如果佢連嗰個專有名詞係咩都唔知咁點翻譯呀?
掉返轉助產士到時有咩緊急決定要我地做, 佢翻譯唔嚟咁點算? 兩條命嚟架!
激死我! 激死我! 激死我! (好激氣所以要講3次!)
另一方面, 我因為擔心BB有先天性缺陷 (因為太遲驗唔到唐氏, 又睇唔到係咪齊五官)
又唔知點同呀媽講佢就抱孫、又未學識呼吸法喺生嗰陣減痛、又未執走佬袋
日日都超級緊張…
但男人就百無聊賴喺屋企打機同成日叫我睇戲…
好彩佢焗住要為我翻譯問題同答案
所以都從中學到一啲生產過程嘅步驟同專業名詞
起碼知道要幫我喺最後關頭問“xxx有咩好處/風險?”“我有咩選擇?”“可唔可以避免xxx?”
我真係好唔想剪會陰/用外力如吸盤或開刀生仔呀!!!
其他一啲對自己嘅小提醒如: 打無痛前提醒我去廁所…
我都會喺助產士面前讀一兩次
等佢到時睇到我啲筆記會有印象
因為我真係好怕痛, 痛嘅時候應該只係叫得出廣東話粗口

第一次做沙發主人

我同男人喺旅行時都鍾意用沙發衝浪Couchsurfing
而且都因為受過沙發主人嘅恩惠而想幫助其他沙發客
男人嘅爸爸好錫佢 即使從未親身體驗過Couchsurfing都被說服打開家門接待陌生人
喺我地返法國頭2個星期、未照超聲波未被嚇親前都冇收到任何住宿請求(小城市係咁…)
就喺我地被超聲波結果嚇親、覺得唔夠時間準備(淨係我)嘅時候收到一個住宿請求
當時我內心係好糾結架
難得有機會接待沙發客, 但我又驚自己隨時生仔而且仲有好多嘢未準備好而覺得好混亂
直頭嬲咗男人對於BB嘅事闊佬懶理但為招待沙發客嘅事而感到興奮
當時佢話如果我唔想接待沙發客, 佢會拒絕個住宿請求, 佢host人只係想大家轉換下心情
而最後我地係接待咗個女仔嘅!
第一次做沙發主人好開心呀, 又一齊出街去男人長大嘅公園行
而且因為呢個係小城市, 只有踩單車旅行同搭順風車嘅人會順路
所以感覺上會嚟嘅人都好酷! 心情絕對有放鬆到~
好彩有沙發客嚟分散我嘅注意力
陪我傾偈等我可以從懷緬過去嘅過程中輕鬆一下
道別時順口嘅一句生仔順利祝福聽起嚟都好有力量
我地接待有史以來第一位沙發客嘅嗰日
就係我地為BB買第一包尿片aka第一件為佢準備嘅嘢嘅日子

第一次做沙發主人嘅我地
第一次做沙發主人嘅我地

Deadline fighter準爸媽開工

我地呢對deadline fighter準爸媽自11月29照第一次超聲波後
直到12月11號先買第一樣準備生仔嘅嘢(尿片)
13號用咗個上晝上網定咗男仔女仔名
14號下晝問曬所有要問嘅問題、確保生仔過程唔會有不必要嘅剪陰手術催生針吸盤等等侵入性干擾、確認生完可以等幾分鐘先由爸爸剪臍帶、生完可以立即skin to skin餵人奶
距離預產期仲有一個月…

第一次內診: 已開1指

雖然助產士喺14號第一次幫我內診時話已經開咗一指
但佢讚我問嘅問題有sense, 又好有耐性咁答曬我問完又問嘅問題
所以即使呼吸法只係練到半桶水, 我嘅心情都開始放輕鬆
點知由醫院行返屋企途中掛住周圍望
個肚撞到應一應落條柱度…
好彩無見紅如果唔係實內疚死 (感激羊水保護!)

食完呢個Kebab就成個肚撞咗埋條柱度...嚇死準爸爸媽媽>0<
食完呢個Kebab就成個肚撞咗埋條柱度…嚇死準爸爸媽媽>0<

產檢後0憂慮

因為已經無曬關於生仔過程嘅疑問
呼吸法同其他生仔要點又已經寫曬落貓紙+brief咗男人一兩次
男人翻譯完我同助產士啲問答又唔再對生產過程一無所知
所以夜晚好安心咁睇完卧虎藏龍先訓

Share on facebook
Share on twitter
Share on pinterest
Share on whatsapp
Share on email

發佈回覆

你的電郵地址並不會被公開。

About us

HiuYing, Darian, Mati and Maxime

♥ 香港 x 法國 ♥ 熱愛旅行嘅一家4口 ♥

Follow我地新奇又有趣嘅旅程啦!

一齊CLS! Comment, Like & Share!

Share on twitter
Share on facebook
Share on google
Share on linkedin
Share on reddit
Share on pinterest
Share on email

想知我地一家人長期旅居嘅秘技??

Join Our !

確保您唔會錯過我地嘅最新動向
啟發您大膽走出comfort zone!