2020年是世紀難忘的一年, 大部分人都活在疫情的新常態下。對我們The Nomad Family而言, 2020是意義重大的一年, 因為我們家增添了一名鼠寶寶。疫情下在法國醫院戴口罩生仔、全天候沒有探病時間, 只能一打一住院三天, 我和Darian哥哥在他出生以來第一次睡在不同的地方… 絕對可以列入成長里程碑! 以下跟大家分享一下Maxime終於成功陪產的尷尬生BB經過, 各位飯前飯後慎入!
跟Darian哥哥的生產記一樣, 為了令大家更能體會到生產當時的真實氣氛和感受, 本文將以粵語記錄。
愚人節愚人愚己
一年前嘅4月1號原本想趁愚人節用“2寶出咗世喇”嚟玩下
諗諗下都係覺得唔好攞呢啲嘢嚟講笑
點知夜晚真係被2寶愚咗鑊, 佢真係揀咗喺呢日出世!
希望佢大個喺4月1號同人講佢今日生日時會有人信佢啦🙈
雖然生弟弟時嘅產痛應該都係遠不及其他媽媽所經歷嘅10級痛/食全餐之痛
但依然比生哥哥時痛, 仲生到羞恥心都冇埋…
Darian哥哥嘅生產過程喺對比之下瞬間變成蚊咬級嘅痛…
Confinement日常中的異常
話說法國當時正值第1次confinement嘅第2個星期, 我已經2個星期冇出過街
愚人節前2日我覺得2寶郁少咗
所以開始喺屋企坐下健身波同食咖哩嚟刺激下佢睇下佢係咪仲健康成長緊
愚人節當日我都好似平時confinement嘅日子咁, 冇乜特別做過啲咩, 都係陪玩行下坐下攤下咁
下晝六點幾上樓上拎充電器同屙尿時
喺廁所又開始feel到屙屎唔出嘅感覺
係呀! 就係當日生Darian時嘅感覺
不過呢次係放到屁但痾唔出嘅版本
陣痛之始
為免又喺同一個廁所生2寶出嚟
所以我屙完尿就走返落去下面梳化
攤住坐咁 叫Darian拎佢想同我玩嘅嘢過嚟玩
點知Darian拎完見到道門閂咗以為我閂佢門, 然後開始喊…
搞咩呀🤷🏻♀️我坐喺度hea緊邊得閒閂門呀?🤷🏻♀️
諗住行去安撫佢 但就係呢個無奈嘅時候
我肚好痛呀!😭
於是我又坐返去梳化
Maxime聽到個仔喊, 所以行出嚟問咩事
講完Darian無啦啦喊
Maxime見我唔多對路, 問我有咩感覺
我痛到喊呀😭 除咗痛就係好痛囉😣😣😣
然後佢問我醫院幾號電話
我叫佢自己搵個醫院file望下
跟住佢就打電話問診
暖男的安慰
我一直以為, 人地用較強嘅經痛嚟形容嘅陣痛係出現喺肚或者lower back
但我嘅痛出現喺我嘅三角位
似係撕裂痛多過醫院話嘅電擊痛
所以當時都覺得BB可能唔係當日出世
Darian喺爸爸講電話時突然好暖男咁遞水俾我
仲叫我唔洗喊, 又抱抱我話BB出咗嚟就唔痛
被暖男關心嘅痛老母我即刻覺得老懷安慰+我真係冇閂門!!!
無懼陣痛 繼續Pizza Night
由於痛完幾十秒之後我又無事可以企直同行
所以我地繼續Wednesday pizza night 🍕
我淨係做啲輕鬆嘢: set下枱切下芝士咁
一肚痛又停低企定, 痛完就活動返, 好似玩一二三紅綠燈咁
備料, 拎嘢出入, 切pizza, 食pizza嘅過程都唔係成日痛, 所以一直都頂得順
但食到第2個pizza就開始出事喇:
明明已經冇再起身拎嘢淨係坐定定食pizza都隔一陣就痛, 每次痛幾十秒就停
唔理住, 一向pizza night都食4個pizza🍕, 就算今日要生仔都要食飽先!
為入院生B準備
開頭仲係覺得啲痛冇乜嘢, 都係繼續食pizza啦
但當時Darian爺爺唔喺屋企
如果我地要去醫院就要預早通知佢返嚟
所以為了以防萬一, 我地召喚咗爺爺返嚟
Maxime又打咗電話去醫院問
醫院問咗宜家嘅狀況同痛嘅間距
話可以再觀察多半個鐘先入院
我食飽之後就上樓攤起梳化諗住搵個contraction timer嚟記錄下
未雨綢繆真係好緊要
喺要用contraction timer先發現原來安裝咗嗰個大肚app嘅contractiom timer係要額外俾錢嘅
急用嘅情況下2歐都真係唔係問題 但要頂住陣痛填信用卡資料先攞命
陣痛緊呀大佬 點樣專注去對數字😑
最後去返Play store download第一個推薦嘅contraction timer就算
我上咗樓冇耐, Maxime就上嚟準備搬走佬袋s上車
仲話要換過件靚衫
話唔係每一日都有得做老豆😂
我睇到雖然覺得有啲好笑
但一邊想笑一邊等緊contraction其實唔係好笑得出
睇住錶同個app見到2次contraction之間個interval大概係五分鐘
轉頭見到Darian爺爺已經趕到返嚟
睇嚟可以入院嘞
原本仲諗緊要唔要沖埋涼或者痾埋屎先出門
但Maxime同爺爺已經係咁催我
所以我淨係洗乾淨咗對手戴口罩就落樓
嗚呀…趕住出門嘅我冇同當時睇緊電視嘅Darian講早抖😭
3年幾嚟第一晚冇一齊瞓喺同一個空間連我愛你同早抖都冇講😭
疫情下入院嘅憂慮
入有肺炎確診case嘅醫院其實都有啲風險
聽講醫院要戴口罩生仔
所以我喺車上面忙住調整我啲口罩繩
喺12分鐘倒嘅車程內我陣痛咗2次
痛與痛之間相距大約4分鐘左右
種痛係坐立不安嘅痛
冇揸車都大大力扯住個扶手
如果我揸車嘅話應該怒踩咗好多次brake
好彩醫院所在嘅城市9點後宵禁
差唔多十點嘅路上只有一隻手數得曬嘅車
燈位亦唔洗等好耐
我睇住個app紀錄嘅contraction interval
同Maxime講我要喺車度等多一次陣痛先落車
用4分鐘嘅自由活動時間行入醫院
Contraction痛到我唔識幫佢戴口罩
所以佢要第一次幫自己戴綁帶口罩(成就解鎖!)
由於佢喺車上面已經打電話問咗要喺邊度搵特別通道入院
所以我地直接行去敲嗰道暗門
等嗰陣見到門口有個寫住covid箭咀嘅牌 個心即刻寒咗寒
2個星期冇出街, 一出街就去醫院呢啲高危地方
其實一早知附近幾個城市得呢間醫院大啲, 所以都叫做有啲心理準備㗎喇
只求唔喺住院呢幾日染上肺炎再帶返屋企傳染三代人🙏
入院生仔喇
我一路行去醫院已經一路向Maxime形容我嘅陣痛:
Feel到想屙屎嗰陣 前面嘅三角位就分裂痛
諗住叫佢陣間翻譯俾助產士聽
喺門口等咗一陣後, 着全副保護衣嘅醫護人員出嚟應門
喺Maxime仲登記緊資料嘅時候, 新一輪嘅陣痛又嚟喇
我痛到連輪椅喺前面都行唔到多一步坐上去呀_
雖然真係痛到爆粗 但幾十秒後我又做返一條好漢, 坐得低
仲由全副保護衣嘅醫護人員推入去婦產科
唔知係我太重定點
坐住輪椅入醫院嘅三、四分鐘路程過咗彷如隔世嘅耐
中間仲有個位撠住咗要起身行🙈
結果半路上再次喺輪椅上經歷多次contraction
由於真係愈嚟愈痛 所以我已經忍唔住嗌到出聲
真實生仔經過
—以下內容飯前飯後慎入—
好不容易又痛完幾十秒, 輪椅停咗喺一間房前
間房係酒店單人房大小: 得一張單人床喺牆邊 旁邊有個助產健身球
一秒驚訝之後我清醒返: 唔係產房嚟嘅~
仲係法文得幾滴水而非半桶水嘅我 聽到有人話去通知助產士
淨係留低我同Maxime喺房
但係我嘅Contraction又嚟喇
痛到我忍唔住直撲上張床嚎叫 真係好L痛
助產士好快嚟到問可唔可以內檢
我完全唔掂喇 未答已經即刻自己除褲
對唔住, 但我真係忍唔住
.
.
.
伴隨陣痛出嚟嘅係💩
💩💩💩💩💩
講出嚟都覺得唔好意思
我清楚知道喺後面個窿痾出嚟嘅唔係BB
但我真係忍唔到
隨住個陣痛我用力推嘅就得💩
跟住我feel到有人喺我後面放咗塊布定唔知咩接住啲💩辛苦曬🙏
幾句法文之後我知道佢地唔需要再檢查, 打算直接推我去產房喇
助產士叫我hold住唔好push住
但我feel到啲屎仲未屙清…
痾咗屎出嚟嗰嘢shameful到我想喊
生B生到羞恥心都冇埋…
但係喊應該冇乜用
乖乖地聽話唔好push住仲實際
36週先嚟臨急抱佛腳溫書嘅拉梅茲呼吸法喺緊急關頭完全應用唔到
我淨係可以趴喺張床到叫同死拉住床邊條欄杆
原本戴緊嘅綁繩口罩都被我一嘢扯爛咗
_ 戴口罩生BB係邊個無腦諗出嚟嘅嘢??
Maxime竟然喺呢個時候問我想攞咩機嚟拍片
我真係*xyz#喇🤬自己諗啦!
間房當時好似有3, 4個助產士
我趴喺床轉身望時, 隱約見到有人揸住個白色長鉗?!
然後就feel到羊水穿咗
一股暖流喺下面流出
由於我痛到趴曬喺到攣埋一舊
佢地亦都由得我冇叫我轉身
只係叫我用4 leg position跪住生
Pushhhhhhhhh
有個助產士喺我陣痛完回緊氣嗰陣行過嚟床邊
用英文同我講下次feel到陣痛就可以push
佢提起要大力吸一口氣再憋氣我先醒起要咁呼吸
於是陣痛嚟嗰陣我大力吸一口氣, 然後憋氣push
聽到幾把聲一齊話出緊嚟喇再嚟多次
於是我又即刻大力吸一口氣, 然後憋氣push
推完第2下真係feel到腿嘅2側有嘢郁緊
而且有喊聲
我知道BB出緊嚟喇! 加油!
再大力吸一口氣+憋氣+push之後
我feel到BB已經出曬嚟喇
即刻攰到趴返低
比較一下2胎嘅生產經歷
上次生Darian都唔知算係push咗幾次(1次?)
今次多500g push3次順利出到嚟我好滿意㗎喇
雖然今次都係冇打無痛
但始終係醫院setting都有用藥
喺我push之前有人喺我手背拮咗支嘢
佢叫我握拳嗰陣我陣痛痛到唔係好做到
平時抽血會擰轉面嘅我望住支針拮落去都唔覺痛
可能係因為同一時間我下面仲痛??🥴
BB係男仔定女仔?
助產士拎咗BB出嚟, 抹走身上啲白色嘢後
我都仲係趴緊喺度, 睇唔到BB係男定女
但助產士話keep咗surprise俾我自己睇
BB出嚟後等咗一兩分鐘先由Maxime剪臍帶
睇返個video發現因為我係趴喺度擰轉身拍片
所以唔啱位+影唔到條臍帶:|
而我最後係聽到Maxime答BB叫咩名而知道BB嘅性別
生產後最痛: 縫針?
BB出世後房內得返2個助產士
我跟住助產士嘅指示push多下推埋個胎盤出嚟
完成咗成個生產過程
一完曬我即刻feel到下面痛
所以即刻叫Maxime幫我翻譯問下要唔要縫針
助產士話因為重有地方流緊血, 可能要縫一針
我同Maxime講我唔想縫呀 叫佢再幫我問多一次
助產士話幫我試下止血 如果一陣返嚟見到冇再流血就可以唔縫
由產前檢查開始我就知道法國嘅生仔過程崇尚自然
可以自然生唔會叫你開刀
打無痛麻醉同剪會陰都唔係例行程序
好多步驟都仲有商量嘅空間
所以都幾放心
助產士幫我嘗試止血後就出咗去
一家3口的寶貴時光
房內得返我地一家3口
我就開始同BB skin-to-skin等佢更易食到人奶
疫情關係醫院唔再俾家屬入病房探病
但助產士們好好呀
原本22:07生完, 爸爸只可以留到00:00
但佢地將啲檢查仔細慢慢做
幫兩父子爭取多個半鐘嘅相處時間
Maxime即刻抱住BB傾偈同錫錫
又播歌仔仲除埋衫同BB skin-to-skin
將未來3日嘅相處時間濃縮喺呢3個幾鐘入面
期間助產士們出出入入幫BB度頭圍同磅重
又搬部機嚟幫BB保持體溫
又幫我抹同沖走身上嘅血
仲幫我爭取到唔洗縫針~
真心尊敬醫護人員呀
助產士除咗接生仲要接屎抹血又要照顧人地唔識講嘢嘅BB
淨係想搵高人工但冇heart真係做唔嚟呀~
冇訪客冇探病時間嘅3日住院
差唔多凌晨2點嗰陣有助產士嚟帶我同BB上房
即係要同爸爸分開喇…
Byebye爸爸之後, 我同BB就由助產士推上房
記得3年前住嘅2人房, 另一個媽媽晚晚扯鼻鼾 日頭就狂傾電話
佢個BB因為要照燈所以唔喺房內瞓
但Darian每次一喊我都怕佢嘈親人而推佢出去兜圈
前兩晚幾乎冇瞓過
日頭又要披頭散髮見訪客
最後一晚轉咗單人房直情好似上咗天堂咁
今次一到埗就見到係單人房超開心呀😆
問助產士拎熱水時佢重拎多兩舊小蛋糕俾我
於是我坐熱完滴雞精飲、食埋小蛋糕先上床抖
4點左右有助產士入嚟提醒我去痾尿, 預咗會痛所以還好啦
佢地幫完BB檢查同換片就走咗
BB全程合埋眼咁滯, 睡眠完全冇被干擾
我就因為傷口有啲痛
同埋想襯記憶猶新記低生產記
所以成晚都瞓下醒下
但眼瞓嘅BB冇乜點喊醒, 所以我基本上幾free
朝早7點半左右聽到房外有聲先準備起身食早餐
果醬+牛油+麵包+乳酪+蘋果汁, 好啱我胃口
唔知係因為我唔識法文/疫情下冇得探病/醫院啲助產士本身真係好好
入嚟嘅每一個人都會嘗試用英文/google translate問我有冇問題有咩需要
令我覺得生完要自己同BB留喺醫院住都唔錯吖
咩都唔洗做, 又唔洗答10萬個為什麼🤣
雖然樓下就係救護車上落嘅地方+入院嘅特別通道
不分日夜都有人出入+傾偈
但每個入房嘅人都即刻唧消毒搓手液消毒雙手
個個戴口罩都戴得啱有遮住口鼻
令我覺得留喺呢間醫院嘅單人房休養好似安全過外面打緊仗嘅世界好多
不過屋企有爸爸同哥哥等緊我地, 所以住3晚就夠喇~
生仔後記
之前見過有準媽媽擔心生仔時痾屎而喺Facebook group發問
有人話護士會叫產婦去廁所先, 有人話陪產老公見到之後有陰影云云
我個咁fail嘅經歷好似冇咩資格出聲, 除咗加油, 就係一句”等BB帶領你啦!”
當日如果揀痾咗先出門, 可能唔會喺助產士面前生BB痾出屎
但亦有可能再次喺屋企廁所幫自己接生…
雖然已經有自己同自己接生嘅經驗😆
但Mati似乎唔想嚇親哥哥, 想喺醫院出世多啲;)
